Tagrawla n Ḥmed Umerri d yimdukal-is: I waken yiwen ur ten-itettu.

Amezruy bḥal tiddas, win yettnezzihen mačči am win yetturaren, yeshel fellas maḍi ad yerbeḥ s wallen mar ad tt-id-yewɛu si lebɛid. Deg mezruy wa yeserwet Wayeḍ iɣellet. ɣas ggugmen yidlisen, imdanen mazal cfan; amezruy bnant yergazen yettunbdaren ar ass-a n wussan. Deg idurar n Ǧerǧer iɛbban acḥal n leqrun, wid yuran amezruy ḍebɛent s idammen-nsen. Ass-a lwelha-nneɣ terra ɣur-sen i wakken ad nsenṭeq s kra n yiles yeɛugnen, wa ad ner tafat ɣef kra n wayen yefren ad t-id nbeggen. Abridnneɣ yewwi-yaɣer temnaḍt Nat buwaddu yerẓan ifadden n urumi, I wakken ad tenjer asalu ɣer tlelli. At Buwaddu, yellan d imnayen n tlelli bḥal Mḥa At Lkew, d amedya ɣef tirrugza i ɣef yenn-a umedyaz:

Abuwaddu mi d-yepinṭiḥ

Tmenɛar si lbab ɣer lbab

Tameddit yeffeɣ ttebriḥ

Teyyam azekka anɣab

Ṛẓan lqum n ṣsuîṭiḥ

Iḥuliyen am imejdab.

Kra seg umezruy n At Buwaddu, lɛerc n Ḥmed Umerri

Lɛerc n At Buwaddu yetabaɛ taqbilt n Igujḍal yebvan ɣef setta n leɛrac: Friqat, At Smaɛil, At Kufi, At Mendas, At Buɣerdan d At Buwaddu. Ddan akk ɣer tɣiwant n

Draɛ Lmizan di lawan-nni n umnekcam afransis.

Yebḍa lɛerc n At Buwaddu ula d netta ɣef setta tudrin: At Jimaɛ, At Mɛellem, At Lmenṣur, At Yiran, At Welḥaǧ akk d Ibadisen. Cerken Wat Buwaddu tilisa d Wat Bucennaca iten-id iqublen am lemri si tama Usammer. Ma nger tiṭ ɣer lǧiha n Umalu, ad aɣ-d-binen Wat Buɣerdan akk d Wat Si Yusef. Seg Ugafa, yezzi-asen-d wakal n Tizi n Tlata i seg id-ffɣen yiberdan yessawnen Yessufuɣen ɣer tudrin. Ma seg Unẓul, d Adrar n Ǧerǧer i ten-id-iḥudden. Win ad d-iwalin At Buwaddu si lbeɛid, ad as-yini d tarewla i rewLen s irebbi n wedrar, amzun bɣan ɣur-s leɛnaya....

Llan sin leryuy i yexallafen ɣef uẓar n yisem-a At Buwaddu: rray amenzu yeqqar: isem-agi yekka-d seg wawal ILDI, axaṭer imezdaɣ n temnaḍt agi ssexdamen ildwan deg umennuɣ. Ma d rray wis-sin, yenna-d: At Buwaddu yekka-d seg WALDUN (rṣaṣ) axaṭer, imezdaɣ n temnaḍt-a d At lbarud. Leryuy agi ad ten-yeqbel leɛqel i sin acku sɛan yiwen n unamek. ILDI neɣ ALDUN mačči d amcabi kan i ttemcabin di lmenṭeq, maɛni ula deg usexdem i tensexdamen: d ILDI neɣ d ALDUN, ssexdamen-ten di lawan-nni d allalen i umennuɣ.

Sɛuẓgen Wat Buwaddu i wulɣu i d-isufeɣ Lḥakem amatu n temdint n Ldzayer ass n 14 di yebrir1844 i deg yeggul di leɛrac ur nekni ara i leḥkem-ines ad yesserɣ tudrin-nsen, ad yessexser nneɛma, ad yegzem tjur, ma yella ur sersen ara leslaḥ neɣ ur d-ssufɣen ara Lxalifa Ben Salem i wumi fkan At Buwaddu leɛnaya. Asmi yeffeɣ Ɛebedlqader Ben Meḥy Ddin Ameɛsekri si tmurt n Yiqbayliyen, i deg i yessuter leɛnaya, yeǧga Lxalifa-ines Si Ḥmed Ṭeyyeb Ben Salem ddaw leɛnaya n At Buwaddu, di taddart n At Jimaɛ. Mi d-yusa mmi-s n Lxalifa Ben Salem ɣer baba-s, s At Buwaddu, heggan-as tameɣra n 4 wussan d rebɛa wuḍan i wakken kan ad-s-neddun di nneqma i yirumyen.

Di magu 1849, asmi yekcem Jiniral Blanjini ɣer tmurt n Yiqbayliyen, qqimen At Buwaddu d ineggura yakk ara yessersen imrigen (leslaḥ) di temnaḍt-agi. Ma d leɛrac nniḍen tɛawd-asen Fransa beṭṭu. Yal lɛerc ṭfen-t sin lecyax i d-sebded Fransa.

Ass n 16 di yebrir 1850, yestenya uneɣlaf n ṭrad di Lpari, yiwen n lkaɣeḍ ɣef At Buwaddu, amzun, ḥeqqa ḥeqqa, ssersen imrigen. Yerna imir-n kan, yerra Si Muḥend Uɛemran, yellan d Ccix n lecyax, d imḍebber fell-asen.

Deg 1851, i yekker Bubeɣla ad innaɣ arumi, iban-d yiwen i ɣef tteklen At Buwaddu, qqaren-as Mḥa At Lkaw. Dɣa fell-asen i yura Yusef Nasib yenna: « D sin yimdanen agi i yekkren ad nnaɣen Irumyen asmi d-kecmen ɣer Ǧerǧer. Yessawev Bubeɣla ad-yejmeɛ ɣur-s leɛrac axaṭer ttqadaren-t madden merra; d ccaf yerna d amrabeḍ, Ma d Mḥa At Lkaw, isem-is yeqqim deg yisfra At Buwaddu».

Mbeɛd kan mi ččan tiyita Yigujḍal di Buɣni ass n 30 Ctember 1851, ruḥen ad ssutren laman ɣer jiniral PELLISSIER, s ufus n Si Lḥaǧ Aɛmer, Ccix n zzaweyya reḥmanya. Akken Azal n wagur neɣ kter, deg wassn 17 Bujember 1851, ssekren cwal yilmeẓyen n At Buwaddu ɣas akken ugin-asen lɛeqqal n taddart. Ihi, asmi teḍra twaɣit di ssuq At Sedqa deg Iwaḍiyen, yiwen n ugumi yekkesasen taqeḍɛit n wulli yerna yeṭṭef 25 d ilemẓi ɣer lḥebs. ɣef aya i yekker ccwal. Yeḥka lyuṭna Bubriṭ i win yellan nnig-s ɣef tedyant yeḍran, yenna-as: « selken-d Wat Buwaddu imeḥbas n Igawawen. Ma d taqeḍɛit ur cliɛen ara deg-s. Meɛni nnan belli ur ttɛemmiden ara ad yeɣli weqbayli zdat cclaɣem-nsen». (Tasɣunt: Revue africaine).

Almi d 1856, la d-ttbin liḥala amzun terked. Yuɣ lḥal d tikellax. Am tmes ddaw walim. Imi kra kan n wussan, yesker Si Lḥaǧ Aɛmer ṭrad di tmurt n Yiqbayliyen.

Ass n 29 ɣuct 1856, At Buwaddu d Wat Buɣerdan wwten lekka n lkumunda Duvan di Tizi n Tlata. Imiren kan lɛesker n Fransa rran aḍar almi d Draɛ Lmizan. Segmi islan s urumi yerra aḍar, ula d leɛrac i sen-d-yezzin i Wat Buwaddu, am Mɛatqa d Yiɣil Imula, kkren-d ula d nutni ad nnaɣen d irumyen.

Deg yimenɣan yekren si 30 ctember almi d 04 di Tuber 1856, thudd Fransa tudrin n At Buwaddu s lekmal, i waken ad terẓ deg-sen tisas rnan gezmen azal n 3000 n tjur n leḥlu deg yiwen was; ass amenzu di tuber 1856. Ula d akken ur ṣawḍen ara ad sseknun tamnaḍt agi n At Buwaddu. Imir dɣa, imi huddent, ṭfen Wat Buwaddu adrar I waken ad kemlen amennuɣ. Mi akken dhan d umennuɣ, lmal-nsen i merra, d wayen I d-eqqimen d cci-nsen ukren-t wid yesqazben i Fransa. Dɣa i wakken ad-rren lmal-nsen, ger tuber 1856 d meɣres 1857, At Buwaddu rran ddaw iḍarren-nsen leɛrac-nni yak yeknan sdat Fransa.

Di tefsut n 1857, ḥebsen akk yimenɣan ger leɛrac, acku lhan d umnekcam i d-iẓedmen. At Buwaddu, seg wakken iten-ɣelben irumyen, imi deg waṭṭas yid-sen yerna wwin-d leslaḥ ijheden, iseɛya-ten umennuɣ, ladɣa deg wussan n 08 d 09 di yulyu 1857. S yin akin, tezḍem Fransa ɣef At Buwaddu, s ufus n lɛaskar tsels si leɛrac. Zzin-asen-d am wemrar ur yezmir yiwen ad yegzem. At Buwaddu ad sarsen imrigen ass n 10 di yulyu 1857, aggur mbeɛd mi teɣli Faḍma n Sumer. Yenna lmarical RANDUN i lɛsaker-is asmi knan At Buwaddu:

« Dayen yekfa ccɣel-nwen. Leqbayel n Ǧerǧer knan. Ur d-yegri ula d yiwen n lɛarc ig-zemren ad-yeffeɣ si leɛṣem-nneɣ. »

I wesmekti kan: ass n 04 di tuber, ilaq-as i lmarical agi, ma ulac akk 10 n trebbuɛa n iserdasen mebla aɛwin iwakken ad-ṣṣiwḍen ad-kecmen taddart n At Jimaɛ, I yura LKULUNEL RUBIN deg yeḍrisen-is ɣef ṭrad. Yura daɣen, LKULUNEL agi deg wedlis-ines : Tanekra n tmrt n leqbayel deg 1871 ( insurrection de la G.K en 1871) ayagi:

« Gguman wat Buwaddu ad-knun, deg useggas n 1856 ɣas ulamma ttwahuddent akk tudrin-nsen ladɣa taddart n At Jimaɛ. D nitni id ingura akk di tmurt n leqbayel i yesutren laman deg useggas n 1857. Tuddar akk yettekkin ɣer tɣiwant n Draɛ Lmizan sersent imrigen ala snat n tudrin n At Buwaddu id iqqimen: At Jimaɛ d WAt Yemɛllem i yuɣalen d laɛnaya i kra n win i d aɣ-yugin d wid akk yebɣan ad mḥasaben yid-neɣ. »

Yura daɣen HANUṬU, deg yedlis-is: “Tamedyazt taɣerfant n Leqbayel n Ǧerǧer”, ɣef temsalt-agi yenna :

« Alma n taḍuṭ d isem d yiwet n luḍa yeẓẓan d tineqlin id yezgan deg ugafa n taddart n temkadbut deg wat Buwaddu. ɣer din dɣa isen-ttawin lmakla i yegrawliwen, dinna i ttdawin imejraḥ, ussan-nni n ṭrad yekren si 30 di ctembar almi d 04 tuber1856. »

Gguman, ihi, At Buwaddu ad knun, rnan aseggas mbaɛd imenɣan-agi iwakken ad sersen Imrigen. Dɣa taddart n At Jimaɛ teṭef almi d 10 di yulyu 1857 ɣas akken arumi ihudd-itt s lekmal ass n 04 di tubar 1856 yerna cerḍen-asen 15070 Frank n lexṭya. Seg imiren ddan-tt irumyen ɣef temnaḍt agi. Ttalsen-d dɣa ɣef wasmi i d-tekker tmurt n yizwawen s lekmal-is deg useggas n 1871, ɣef uqerru-s Lḥaǧ Muḥend At Umeqran d Ccix Aḥedd ad, taddart n At Jimeɛ tɛedda daɣen di tessirt, dɣa yiwen si tawaculin n At Ḥemmu (tawacult n Ḥmed Umerri) nɣan-as iserdasen n Jiniral Cerez, (7) sebɛa yirgazen, tenger deg yiwen wass, imi i d-kren ad rren ɣef nnif-nsen. Mi truḥ yemmat-sen ar yiwen wemrabeḍ ad s-d-yefk lkettan n lbafetta ad tejmeɛ deg-s allaɣ n yiwen seg waraw-is i wakken ad yili wamek ara tmeḍlen deg-s, yenna-s-d wemrabeḍ-nni, ṣber tzeqefeḍ qbel imeṭṭawen-im ma tebɣiḍ ad m-fkeɣ ayen i ɣef akka i d-tusiḍ, tameṭṭut tezza tasa-s terra-as-d imiren kan s usefru-a, yuɣalen d inzi:

D win ur njerreb i d-iyi-nnan

Yenna-ayi “ṣber ur ttru!”

Ttxil-k a Llah d-iwalan

Tasa-w tezza ad t-qellu

Win ur numin s xellu

Immuqel afrag n At Ḥemmu

Nekni yules-aɣ-tt-id Mass Brahimi Muḥend Aɛrab n taddart At Jimeɛ deg At Buwaddu. Akka ihi i teḍra di temnaḍin n Lezzayer akken ma llant. Ladɣa tamurt n Yiqbayliyen yugin ad tidir ddaw uzaglu n umnekcam arumi. Tamnaḍt-a ur neqbil ddel, teǧǧa-d isem-is deg umezruy s yargazen d tlawin id-turew. Kren-d ad nnaɣen d weɛdaw s wayen id-yeɣlin deg ifassen-nsen. Ulac tamnaḍt tezgel tyita, maɛni llant temnaḍin yuzlen deg yilsawen ɣef tiyaḍ, yal yiwet amek id-as-teḍra. At Buwaddu ihi d amedya, teqqim deg umezruy axaṭer tefka-d irgazen id yeqqimen ar ass-a n wussan deg cfawat n yemdanen. D nutni i yerran ṣerf i urumi, qublen-t s zeddi n lqedd akken ad rren ɣef nnif-nsen d lḥerma n tmurt-nsen, tamurt n yal Aqbayli.

Yiwen seg warraw-is, isem-is yuzzel ɣef yilsawen, mucaɛ ɣer yimdanen, izdem-d tabɣest d tissas s ɣur lejdud-is At Buwaddu, qqaren-as: Ḥmed Umarri. D netta i yeggulen ad isebbel tarwiḥt-is i wakken ad tidir tmurt-is di tlelli d yiseɣ.

D anwa-t Ḥmed Umerri?

Ilul Ḥmed Umerri ass n 10 di tuber aseggas n 1911, deg At Jimaɛ (deg lɛerc n At Buwaddu). D mmi-s n Ssaɛid n Ɛmer akk d Ḥemmad Mesɛuda n Caɛban. Isem-is n tidett: Ḥmed At Ḥemmu (Belɛidi Ḥmed seg wedrum n At Ḥemmu). Isem agi n Umerri, fkan-as-t di tazwara i baba-s Ssaɛid. Yekka-d seg wawal «mri» yebɣan ad yini: sefruri (wwet tesefruriḍ kra neɣ albeɛḍ) yeqqim-d useqdec n wawal-a deg umedya agi: “Ruḥ ad temriḍ tizya-k”. Yesɛedda Ḥmed Umerri temzi-s d ameksa, am netta am tnudda-s lawan-nni. Yuɣal yekcem ɣer uɣerbaz n yemrabḍen irumyen, yeɣra ɣur-sen 3 iseggasen. Mi yedrem uɣerbaz-nni i deg yeqqar, yuɣal ɣer tyessawt. Syin akin ufan-as-d amkan n lxedma deg izuɣar n Mtija, anida i d-yufa iman-is i leqeḍ aḍil. Deg useggas n 1932, ssawlen-as-d irumyen ɣer lɛeskar. Di 1934, mi d-yuɣal si lɛeskar, yercel, yuɣ Ḥamum Lǧuher. Ur iɛeṭṭel ara aṭṭas, yunag ɣer tmurt n Fransa deg useggas n 1936 iwakken ad d-inadi ɣef weɣrum-is d win n twacult-is am netta am tezyiwin-ines, di lɣerba i yebda yettissin belli Fransa ur tent-ḥsib ara d imdanen am wiyaḍ.

Asmi yebda Ṭrad Agreɣlan Wis-sin, sawlen-as-d daɣen ɣer lɛeskar, ceyɛent ɣer tlisa n Fransa d tmurt n Biljik akken ad yennaɣ d Lalman. Dɣa din i teṭfen ilalmaniyen ɣer lḥebs yiwen ur inuda fell-as. Din-a i yeḥulfa ugar s temḥeqranit yellan d leḥyaf txeddem Fransa ger iserdassen-is.

Akken kan teɣli Fransa ddaw uḍar n Lalman, irwel-d Umerri si lḥebs, yeṭṭef lbabur it-id yessawḍen ɣer tmanaɣt n Lzzayer. Mbeɛd kra n wussan kan mi d-yewweḍ ɣer tmurt, ṭfent iserdasen n Fransa netta d wemdakel-is Nazef Remḍan. Rran-ten ɣer lkazirna n Belfur di Lḥarrac anida yuɣal d aɛsekriw di Rrjima wis 5 n iɛeskeriyen i zzayriyen ( 5ième régiment des tirailleurs algériens RTA). Di lkazerna n Belfur i yemlal i tikkelt tamezwarut imeɣnasen n ukabar n wegdud azzayri (PPA). Seg imiren, yebda yettfaq ugar ɣef ayen iḍerrun di Tmurt.

« Semman-as medden imenfi netta turrugza d ayla-s » :

Mi treḍqent tedyanin n 25 di yennayer 1941, yella Ḥmed Umerri ger imenza itent-id-yesekren ɣer yidis n imeɣnasen n n ukabar n PPA, ɣef wakken id d-yenna Ɛerrad Muḥend, i yellan lawan-nni ula d netta d aserdas di RTA n Belfur di cahada-ines ɣef Ḥmed Umerri :

« Nekk akked Belɛidi Ḥmed, i wumi qqaren Ḥmed Umerri, nella akken di lkazirna n Lḥerrac. Yella ger imenza i d-yessekren tidyanin n yennayer 1941. Uqbel ad krent tmesbaniyin, yella yesfaqay iɛsekriyen di lkazirna. Yerna yettnejmaɛ yid-sen s tufra di tmeqbert n Belfur neɣ tikwal di yiwet n lqahwa di Lḥerrac. Yezga yekkat di lḥukuma n Fransa. Asmi yekker ccwal, yella Lkapural Musawi n Draâ Lmizan s idis n Ḥmed Umerri (....) D acu kan ccwalat-nni ur ɛeṭlen ara. Ma d tarbaɛt yekmanda Umerri terwel ɣer Sidi Musa. Nekk ttwaṭfeɣ ɣer lḥebs, dɣa seg imiren ur nemlal ara».

Ula d Ben Ɛellal yedda-d deg wawal n Ɛerrad Muḥend yenna:

« Belɛidi Ḥmed i wumi qqaren: Umerri n At Buwaddu yeffeɣ-as afus i larmi n Fransa, axater yella d imḍebber amenzu ɣef tmesbaniyin yekren di lkazirna n Lḥerrac. D netta i yenɣan aɛessas n lmina. D mmi-s ɛemmi Cekrun Ɛli, yellan ula d aɛsekriw di Belfur lawan-nni, ger wid iḥeḍren i tedyant agi, iyi-d-yeḥkan». D tagi ihi i d sebba i t-yeǧǧan ad yeffeɣ s amadaɣ.

Yura Meḥfuḍ Qeddac deg wedlis-is « Amezruy n Tɣelnaẓri n Lzzayer » (Histoire du Nationnalisme Algérien): «...ugar n ¾ n iɛsekriwen tssels Fransa, nneɣlen s leslaḥ ɣef temdint n « Maison Carrée» ssawalen ɣer Umennuɣ. Deg iḍ-nni kan, tensa taluft, ttwaṭfen akk wid i t-id-yessekren...».

Ḥmed Umerri yella seg wid iselken I tmesbaniyin-a, netta d kra n yimdukal-is, ger-asen Lɛifawi Crif n Sidi Ɛisa. Rewlen di sin ɣer Sidi Musa, fɣen ɣer wedrar n Buzegza, s yi-n ɣer tmurt n Yiqbayliyen.

Wid I d-yessekren timesbaniyin, iɣaḍ-iten akk lḥal imi I d-yessawel Msali Ḥaǧ, yella d aqerru n ukabar, ad tent-ḥebsen. Ma d Umerri, i yellan ula d netta deg ukabar n PPA, yejbed iman-is yuɣal, cwiṭ cwiṭ, d imḍebber ɣef yiwet n terbaɛtt i yesbedd s ufus n yimdukal-is, wid ukkud yettɛerri imerkantiyen i wakken ad iɛiwen igellilen.

Uqbel ad yebdu Ṭrad Agraɣlan Wis-ssin, yella deg iwaḍiyen yiwen n ṣbiṭer, i yeṭṭefent temrabḍin tirumyin i d-cceyyeɛ tmurt n Legliz akken ad tɛiwen Fransa. Maca, akken kan kan testenya lḥukuma n ‘’Vichy’’ lɛahd n talwit d tmurt n Lalman deg useggas n 1940, timrabḍin-agi iḥettem-itent lḥal ad ruḥent, ad ǧǧent ṣbiṭer-nni.

Dɣa ass mi id-ilḥeq waṭan n burekku (tifis) deg 1942, teqqim temnaḍt s lekmal mebla Isufar n tujya. Imezdaɣ n temnaḍt-a ɣaḍen Ḥmed Umerri, ɣef waya i yekcemen s tufra ɣer ṣbiṭer-nni, netta d umdakkel-is Badwi Belkasem, dmen-d lidrat d tfarsuday akk d isufar n tujya, farqen-ten i yimezdaɣ i ten-yuḥwaǧen. Dɣa teḥekm fella-sen Fransa, mebla ma ḥeḍeren, s 18 n wagguren d lḥebs. Badwi Belkasem yerrunda, xas akken ur d as-t-semeḥ ara Fransa almi d ass mi tefra. Ma d Ḥmed Umerri, yefɣ-as afus, yugi ad yeknu sdat-s yuɣal yekker waḥd-s ad d-yerr ttar I yigellilen. Win d-yeɣlin deg webrid-is; d arumi neɣ d lqayed ur t-yettqili ara. Yeggul ur yekni zdat leḥkem urumi, yeṭṭef amadaɣ, iɛemmed ad yidir tudart n « imenfan » wala ad yanez i ddel. ɣef wakken id-ḥkan fell-as wid it-isnen, yella Ḥmed Umerri, d annifi d bu tissas, d argaz d wawal, leɛmer yexdim zzur deg yiwen, yettɛerri wid yukren ayla n wegdud, yettak idrimen-nni i d-ittawi i yigellilen wid iten-yuklalen. Dɣa ula d amdakel-is, Xeyyar Areẓqi, yellan yettekki di ‘’l’organisation civil” n FLN yenna fell-as:

« Ssneɣ akken ilaq Belɛidi Ḥmed iwumi qqaren Ḥmed Umerri, yellan d amdakel-iw: yiwen wass irewl-d s axxam-iw akken ad yeffer. Tella Fransa tettabaɛ-it imi yeffeɣ ɣef ṭṭaɛa-ines yella yekrah Fransa d wid akk yeddan yid-s. Ḥmed Umerri d argaz n lḥeqq, yettɛwan imaɣban seg wakken i yekyes yesrusu aqqerru-s mara ad iɛeddi sdat medden, ladɣa sdat n tlawin».

Ḥmed Umerri ihi am netta am wid yefɣen uqbel-is, yeffeɣ akken ad yefk taḍriḥt i lqeggad d wid akk yeddan d Fransa di lawan-nni, am yigumiyen d cwambeṭ. Aṭṭas i t-ittcabin ɣer wid ifɣen uqbel-is am Urezqi Lbacir, Aɣbdun, Ɛisa n Wakkuɛen neɣ tikwal ɣer Benẓelmat n tmurt Icawiyen. Yeggul lmir n Draɛ lmizan di Ḥmed Umerri ak d wemdakkel-is Slimani Ḥmed ad-uɣalen ɣer webrid neɣ ma ulac ad-serɣen taddart-nsen. Lamaɛna Ḥmed Umerri yesɛuẓẓeg, ɣas akken tajmaɛt n taddart tettḥellil deg-s d daḥellel. Yecfa Ḥemmadi Rabeḥ i tedyanin agi yeḥka-d yenna:

« lawan-nni tanmehla n Draɛ Lmizan tumer tajmaɛt n taddart ad tenhu sin yergazen agi ad uɣalen s abrid, ma ulac ad sserɣen tudrin nneɣ. Dɣa, imiren-nni kan , kkren lɛeqqal jemɛen-d at taddart i wakken ad asen-sfehmen tamsalt, yerna ad sɛarṣen ɣef sin yergazen agi akken ad rrundin . Slimani yeqbel, ma d Ḥmed Umerri yegguma ad yeknu yenna-asen: « si zik lliɣ d aɛdaw n Fransa. Tura mazal-iyi d aɛdaw-is. Am ass-a am zekka akka ara qqimeɣ, alama mmuteɣ. Nekk leɛmer xdimeɛ ayen n dir i yiwen seg-wen. Ǧǧet-iyi, ihi, ad msefhameɣ d irumyen akken sneɣ». Akken teéra Fransa belli dayen yefɣa-s afus, teɛreḍ ad terẓ Umerri akken nniḍen. Tseres ɣef twacult-is, teggul ad-asen-tekkes tamezduɣt, ad-tt-tefk i Leɛsaker isinigaliyen, ma yugi imenfi-agi ad yuɣal s abrid wad yeḍleb leɛnaya n Fransa. ɣas akken, Umerri mazal-it yesɛuẓẓeg. Rnan kan kra n wussan, texdem Fransa ayen treggem. Rsen-d wazal n 40 n iɛsekriyen ɣef At Buwaddu ttuselḥen almi dayen. Sɛeddan si tɛeṣṣart kra n win i as-yettilin i Ḥmed Umerri, qeḍɛen-asen ula d lmakla. Uɣlen sbedden lɛessa ɣef twacult-is, xelṣen kra n imucaren i wakken ad ṣṣiwḍen lexbarat-is, ad walin akk anwa i itefɣen d win ikečmen. Dɣa deg useggas n 1944, ass wis 40 yum seg imi tlul yelli-s Faḍma, yerza-d Ḥmed Umerri s axxam ad iẓer yelli-s yernan ɣur-s, ɣas akken yeẓra d acu it-yettraǧun. Yeẓra Fransa tefka fell-as tajɛelt. A t-an wamek teḍra temsalt, tules-aɣ-tt-id yelli-s s timmad-is:

“ Ḥekan-iyi-d ɣef was mi d-luleɣ, yeqqim baba, ur yeḥdir mi luleɣ, yerna acḥal n wussan ur d-iyi-ẓri ara. Ass n wis rebɛin yum yerza-d ɣer wexxam, lameɛna imucaren tesbed Fransa ad t-ɛassen, sawḍen lexbar, iwweḍ-d imir imir ujadarmi d yiwen seg imucaren ad teṭṭfen imi tettunefk fell-as tejɛlet i win ara t-yeɣen. Sbedden-as-d di sin tireṣilt almi twalan ikcem-d berzen-d ɣef twwurt, jebden znad ḥuzan-t deg wammas ma d yemma yellan terba-yi ɣef yiri lkanun, di lxelɛa-nni tebra-yi ɣef tirgin, yerɣa wezgen deg wudem-iw. Tura qqimeɣ d taneɛyubt s yiwet n tiṭ” Wagi d yiwen umedya kan ɣef zzur texdem Fransa d wid yeddan yid-s di Ḥmed Umerri d twacult-is, imi yugi ad d-yidir ddaw n uzaglu-ines.

Umerri d W-At Ukabar n PPA.

Mbeɛd tidyanin n 08 Magu 1945, yuɣal Ḥmed Umerri, yettnaɣ akken nniḍen, mačči am zik ass mi yebda. Adrim-nni id i tekkes i yimerkantiyen, yuɣal tura yettakit i ukabar n PPA, yellan yepheggi, lawan-nni di tmurt n leqbayel ayen i wumi semman « Les Premiers maquis» neɣ «Imudaɣ Imenza», s ufus n sin yemḍebren n PPA, Bellewnis akked Muḥemmed Zerwali, yettwakelfen s usbeddi n imudaɣ agi. ɣef akken d-yenna weɣmis «Algérie Actualité», id d- yefɣen ddurt n 04 ɣer 09 deg aggur n Magu 1969, icehed-d Zerwali akk d Muḥend Saɛid Maɛzuzi, belli, d imḍebren imeqranen n ukabar isen-iṛegmen ad binent trebbuyaɛ timselḥin nniḍen di tamiwin nniḍen n tmurt, dɣa imiren issawel Zerwali, s yisem n ukabar i trbaɛt n Ḥmed Umerri, i wakken ad dduklen; Umerri yeqbel tamsalt, labeɛda mi yemlal yidsen. Yessawel ula d netta i yemdukal-is d kra n win akk yefɣen afus i Fransa i wakkenad rnun ɣer terbaɛt-is. S wakka tennerna terbaɛt n Umerri imi i d-rnan ɣur-s kra seg wid ikerhen Fransa: imenfan, imẓarṭiyen…ger-asen: Ḥaǧ Ɛli Arezqi seg Iɣil Imula, i yuɣalen d Lyuṭna amenzu n Ḥmed Umerri, Iwadaren Ɛli seg At Mendas, Lyuṭna-ines wis-sin. Rnu ɣer-sen Wasil Ɛli seg Iɛezzunen, Ḥewwas akk d Ɛmer Xuǧa Ḥsen (umi qqaren Ḥsen Ɛeṣman) seg Umecras, atmaten Galez, Cili Ḥusin, Babu Saɛid, Baca Yidir akk d widak nniḍen deg aṭṭas yid-sen. Mi dduklen fkan tiyita i yirumyen di temnaḍt agi n Leqbayel: nɣan atmaten Ḥ ixedmen lbaṭel deg At buwaddu( Ḥ. Ḥ. yenɣa-t Umerri deg Umecras ass n 28 Bujember1946, ma d gma-s Ḥ. S. netta d Ccambiṭ, yenɣa-t Umerri deg At Jimaɛ ass n 26 Yennayer1947, agur mbeɛd mi yemmut gma-s. Syin akin iɛerra lkar At Wasif netta d yimdukal-is, Ḥaǧ Ɛli d Iwadaren ass n 13 Yennayer 1947, rnan La SIP (société indigene de prévoyance) deg Umecras ass n 25 di Yennayer 1947. Kra seg yidrimen-nni i d-ḥellan nefqen-ten-id azekka-nni n lexwacer i at taddart. Aɣmis n «Alger Républicain» n 16 di Yennayer 1947 yura di tewriqin-is timezwura : “Di temnaḍt n Draɛ Lmizan : Tlata n yimenfan ḥebsen lkar n At Wasif, ɛerran wid i d-yeddan, ksen-asen 100.000 n Frank. Uɣalen s adrar.” Ma d aɣmis n « Journal d’ Alger», n 16 di Yennayer 1947 yur-ad: « Ḥmed Umerri, yeddan di lǧerra n Urezqi Lbacir, mazal-it yettɛerri imsebriden: netta d sin yemdukal-is yettwaselḥen almi kan, yesseḥbes lkar, iɛerra wid i d- yeddan deg-s .»

Ma d aḥric ameqran deg yidrimen-nni i d-itekkes i yimerkantiyen yettarra-ten ɣer texriṭ n PPA i wakken ad d-aɣen leslaḥ. ɣef akken i d-yedda deg rrabul i d-yessufeɣ leḥakem amatu n Lzzayer deg aggur n Yunyu 1939 texriṭ agi, yella yeṭṭef-itt Awcic Muḥmmed Ben Ɛisa yallan imir-nni d amgensas (i d-yesbedd ukabar) n akabar n PPA di temnaḍt n Draɛ Lmizan. Awcic yettwaṭṭef ɣer lḥebs deg useggas n 1946, imi I d- yeṭṭef idrimen i s-d-yefka Ḥmed Umerri i wakken ad iɛiwen akabar. Ayagi iwekked-it-id Brahimi Sɛid, I d-yesɛeddan lḥebs netta d Awcic yenna:

« Nek ttwaḥebseɣ di lexrif n useggas 1945, mebeɛd mi nnuɣaɣ d yiwen. Sɛeddaɣ lḥebs di Draɛ Lmizan, anida i yesneɣ Awcic Muḥemmed Ben Ɛisa n Umecras. Netta yettwaḥbes di ccetwa n useggas 1946 imi I d-yeṭṭef idrimen seg ufus n Ḥmed Umerri (.....) iqqerra-d sdat-i belli adrim-nni yefka-as-t-id Umerri i wakken ad iɛiwen s yi-s « Akabar n Wegdud Azzayri (PPA) ».

Ay-agi d ttbut i d- iwekkden belli Umerri d tarbaɛt-is kecmen s tidett deg ukabar agi. Ula d Lḥusin Ait Ḥmed iwekked-it-id deg udlis-is: « Cfawat n wegrawliw ger 1942 d 1952 » (Mémoire d’un combatant (1942-1952), Bucen, 1990, isb.69.) yura:

« ...Umerri, imenfi-nni mucaɛen, ibedlen udem I umezruy, yeseḥbas lkiran, mačči i wakken kan ad-ten-iɛerri, lamaɛni i waken daɣen, ad yini i yemsebriden suɣet « tudert i l PPA! Tudert i timunnent! (...) nekni s yelmeẓyen n Leqbayel, nedder tiswiɛin ur d nettuɣal, necfa ɣef wass mi nesdukkul ger tiktiwin d lefɛayel, [necfa ɣef wid iteggen ayen i d-qqaren] ».

Ɛli Zaɛmum daɣen deg wedlis: (« Tamurt Imaziɣen », Raḥma, 199, isb. 88-90), icehed-d ɣef wegaz-a yenna : « Imeɣnasen n ukabar PPA ttqadaren-t akka, Umerri akked Ḥaǧ Ɛli kren-d mgal Fransa, dayen isefraḥen, llan yid-neɣ,[d imdukal-nneɣ ].»

Ass mi twala Fransa belli tarbaɛt n Ḥmed Umerri tebda tettnerni, yerna tettɛawan akabar n PPA teɛreḍ ad terr ttar deg imezdaɣ temnaḍt-agi yeṭfen afus i yigrawliwen. Ula d acu i sen-teǧǧa, ulac tixidas ur tsexdem ara akken ad teɣḍel azgaz-agi. Seg wakken ur s d-iwwin ara ibeckiḍen, tuɣal ɣer tkarkas d txidas. Aṭṭas i tseḍmeɛ s cciɛa d usemmeḥ is-i-tewɛed kra n win ara yenɣen Ḥmed Umerri d yemdukal-is! Ula d iɣmisen ttikkin, i waken ad wwten azrem s aqerru. D ɣa aɣmis «Journal d’Alger » I d-yefɣen ass n 18 di furar 1947 yenna deg iseṭṭiren-is:

« (.....) Rray amenzu, yerna d win iṣeḥḥan, d abrid n ṣwab iteṭṭef tejmaɛt n taddart Iɛezzunen, d timenɣiwt n sin imenfan- agi yettwasnen, yerna ur tettuɣal ara deg wawal. Tefka tamgarṭ-nsen, i twacult Wasil yettwasnen nezzeh di tama-yagi, d nettat ara d-yelhin d tmenɣiwt-nsen. »

Yerna-d daɣen waɣmis-agi:

« Nezmer ad nini belli ttawilat akk inesexdem i wakken a neɣḍel imenfan-agi ur ɣ-ssawḍen ara ɣer wayen nebɣa. Ihi, yeqqim-aɣ-d yiwen n ttawil iwakken ad d-neṭṭef Umerri d Ḥaǧ Ɛli. Ilaq ad nesaki deg wegdud aqbayli tamsalt n nnif. Akken ad t-nesiweḍ ad yessexdem netta s timad-is ttawilat ilaqen akken ad d-ikkes wid akk ur nesteɛrif ara s laɛnaya n Fransa di tmurt n Lzzayer s umata. »

Tewwet Fransa s wayen tesɛa d tazmert amek ara tesimes isem n Ḥmed Umerri ger yemdukkal-is d wid it-iḥemlen, ulac acu ur s-tesbbub di leɛwayer d wayen ur yexdim ara, tger-d fell-as ayen ur nelli ara deg-s. Tikkelt-a tewweḍ ɣer tin n nnif imi teẓra acḥal yeswa ɣer Leqbayel. Ihi, akka i d-yennulfa wayen i wumi isemma weɣmis n « Alger Républicain » id -yefɣen ɣef teɣzi n ddurt n 18 ɣer 25 di Yennayer 1947: « Tamsalt n Ruza tuzyint » (L’affaire Roza La Belle). Ata-n wacu id d-yura weɣmis-a: Azwel ameqran d wa : «Belɛidi, umi qqaren Umerri yuker Ruza tuzyint, tameṭṭut n Iwadaren yettnadin amek ar ad d-yerr ttar. D twaɣit i yeḍran di tmurt n Leqbayel: tlata yergazen ttnaɣen am uccanen ɣef Ruza tuzyint; uzlen idammen tlata iberdan.»

Alger Républicain yesnulfa-d tamsalt-agi i wakken kan ad yessimes tlata yergazen agi, ahat ad-ten-yeǧǧ wegdud i sen-yeṭṭfen afus acḥal aya, mara iẓer belli yexnunes nnif-nsen. Axaṭer ma yeǧǧa-ten wegdud ad ishilen i usɣḍel. Tamsalt agi n Ruza tuzyint yeskaddeb-itt imir imir weɣmis «Egalité» n Ferḥat Ɛebbas ass n 13 deg aggur n Furar 1947. Yura-d weɣmis agi deg iseṭṭiren-is imezwura: « Imenfan n tmurt n Leqbayel d wamek i ten-cqirriwen iserdasen n Fransa», yenna belli tameṭṭut-a d iserdasen n Fransa itt-iḥebsen nettat d waṭṭas n tlawin d temɣarin deg yiḍ n 24 di yennayer 1947 di taddart n At mendas deg Umecras. Yerna anect-a d ayen i d-isnulfa weɣmis “Alger Républcain” I waken ad isluɣ taluft, u ad yernu zzit i tmes.

I wakken kan ad-begnen i wegdud, belli d inifiyen i yellan, yrna mazal-iten d imdukal am zik, arnu ɣer-s tamsalt agi tesnulfatt-id Fransa i wakken ad tebḍu ger-asen, yerna ad t-sexnunes ismawen-nsen, yeqsed Ḥmed Umerri netta d sin lyuṭnat-ines: Iwadaren Ɛli d Ḥaǧ Ɛli Arezki, la SIP n Umecras (la société indigène de prévoyance), ɛerran-tt iḍ n 25 di yennayer 1947, sdat n tmanya ( inagan. Ɣef tedyant agi dɣa, yura weɣmis «Echo d’Alger» id-ifɣen ass n 28 deg waggur n Yennayer 1947: « Tamurt n Leqbayel mazal-itt ddaw uzglu n terbaɛt n Umerri. Tlata imenfan ukren 450.000 frank di la SIP Umecras, uɣen abrid, mbeɛd mi sefrawsen inagan »

Ḥmed Umerri iɣab am yitri

Ass n lḥedd, 16 di Furar, aseggas n 1947, iruḥ Ḥmed Umerri ɣer wemdakel-i s Wasil Ɛli n Iɛezzunen iten-id-iɛerḍen s imensi netta d Lyuṭna-ines amezwaru Ḥaǧ Ɛli Arezqi. Yuɣ lḥal Wasil, tesḍemeɛ-it Fransa ad s-tfek cciɛa yerna ad-stsemmeḥ akk ayen yexdem yakan, ma yella yenɣa ccifan-is Umerri d Ḥaǧ Ɛli. Yerna tessaweḍ-it ad yamen belli Umerri yeqsed ad yaker azal n 4 neɣ 5 n tullas si taddart-is, ger-asent yiwet i-s-yettilin I Wasil Ɛli. Aɣmis Journal d’Alger I d-yefɣen ass n 16 d 17 di Furar 1947, igan azwel i usebtar-is amezwaru: « Deg idurar n Leqbayel, Umerri d Ḥaǧ Ɛli yenɣaten yiwen seg yimdukal-nsen», yeḥka-d deg yeḍrisen-is yenna: « ... Di taddart Iɛezzunen, I d-yezgan deg lɛerc n Kuryet, i yenɣa yiwen i wumi qqaren Wasil, sin imenfan agi i wakken ad d-yerr ttar ɣef nnif-is yexnunsen». Ḥemmad Muḥend Arezqi yeskaddeb ay-agi yenna di cahada-ines: « Argaz agi yeskaddeb imi id d-yenna belli Umerri iqsed Iɛɛezzunen i wakken ad yaker, ḥeqqa ḥeqqa, kra n tlawin is-yettilin I Wasil, ayagi d lekdeb imi Umerri yella d amdakel-is yerna nepa yides d iḍulan. Rnu ɣer-s Umerri d anifi, d argaz aḥermi, Ur t-nessin ara ixeddem deg tigi. » Dɣa deg wexxam n Wasil Ɛli isen-d-sɣimen i Umerri akk d Ḥaǧ Ɛli wid imi fkan laman.

Ɣef akken id-nnan yiɣmisen n lawan-nni Ḥmed Umerri d Ḥaǧ Ɛli Arezqi, ɣlin di tcerkett i sen-d-thegga Fransa s ufus n kra n wid yeddan yid-s am Rawli Akli, yellan imiren d aselway n tɣiwant n Iɛezzunen, akk d Ṣerrur Akli yellan ula d netta d lmir n At Lqayed. Xtaren Wasal Ɛli i wakken ad d-ineɣ Umerri d Ḥaǧ Ɛli imi ẓran d imdukal-is yerna gan-as laman d amqran, sehlen-as maḍi akken ad-ten-ikellex. Journal d’Alger I d-yefɣen ass n 18 di furar 1947, deg isetiren-is imenza yura-d ɣef tmettant n Ḥmed Umerri d Ḥaǧ Ɛli yenna: « Yir tagara n sin imenfan. Umerri d Ḥaǧ Ɛli ɣlin di tcerkett isen-tundi Fransa s ufus n Leqbayel merra. Tenɣaten ɣef tbaqit n seksu di taddart n Iɛezzunen s ufus n twacult Wasil. » A ɣmis agi yeḥka-d s ttfaṣil tadyant akken teḍra:

« Wasil iɛerḍ-d Ḥmed Umerri d Ḥaǧ Ɛli ɣer imensi id-yettwaheggan ɣef ddema-nsen. Fkan-as laman, qesden taddart n Iɛezzunen tameddit n wass n lḥedd 16 di Furar. Mi yewḍen ɣer din, llan ttuselḥen dayen kan. Mi i d-ttheggin imensi, wid I d-xtar tejmaɛt ad-ttekkin di tedyant, zzin-d i wexxam am umeqyas i wakken ad ɛassen sin yergazen agi ma yella ɛerḍen ad rewlen. Ma d Wasil Ɛli Ben Ɛmer akk d uḍeggal-is Wagni Arezqi setreḥben yissen (....) Mi yelhan deg imensi isen-d-gerzen, i fureṣ wagni Arezqi tagnitt, yuzzel ɣer Ḥaǧ Ɛli icudd-it s umrar, imiren kan, Wasil i ssureg tamgḥelt-is ɣef Umerri ijreḥit yeɣli, lamaɛna ur yemmut ara imiren. Ɣas akken yejreḥ, isuffeɣ-d taḥerast-is, ijbed znad, lewjeh amezwaru iḥuza Wagni Arezqi di tayett, wis-sin, yessafeg-as tacacit i Wasil Ɛli. Akken it-iẓra ur yemmut ara, yekker-d Wasil iɣawel yeddem-d abeckiḍ n Ḥmed Umerri i yeǧǧa sdat n twwurt mi-d-ikcem, yewwet yi-s Ḥaǧ Ɛli yellan yetwarez, iḥuza-t deg wul, imiren yezzi-d ɣer Umerri, yexnunsen deg idammen-is, ikemmel-as, yenɣa-t.»

Aɣmis agi yura-d daɣen di tezrigin-is id yefɣen ass n 17 di Furar 1947, belli Umerri, d lyuṭna-ines Ḥaǧ Ɛli yenɣaten yiwen seg imdukal-nsen. Azekka-nni kan, ass n 18 di Furar, aɣmis agi , am akken yebɣa ad d-yerr aman ɣer tregwa-nsen, iɛewed azwel i umagrad-is, yura-d: « Umerri akk d Ḥaǧ Ɛli ɣlin di tcerkett i sen-tundi Fransa. » I wakken ad sensen times iceɛlen, wa ad-ssimnen medden belli tadyant-agi, tufaf, tɛedda deg uqerdac, rnan-as-d: « S ufus n Leqbayel ». Umerri akked Ḥaǧ Ɛli, ttwaɣedren di laman, ass n 16 di Furar, aseggas n 1947. Ass i deg I d-tlul l’ O.S. « Tuddsa Timselleḥt Tuffirt » n ukabar PPA. Ur ḥḍiren ara i wakken ad-ttikkin, ad rnun iɣallen-nsen ɣer-s.

Aɣmis n «Echo d’Alger», n wass n 18 di Furar, yura ula d netta: « A yadra lmut n imenfi Ḥmed Umerri d tagara n imenfan di tmur n Leqbayel?». Aɣmis agi, ass-nni, yefka-d asteqsi i ɣef nezmer ad-nerr ass-a, imi ɣas akken yemmut Umerri, gran-d deffir-s yemdukal-is, wid i kemlen amcwar n umennuɣ yebda. D Iwadaren Ɛli, lyuṭna wis-sin n Ḥmed Umerri i yuɣlen d aqarru ɣef terbaɛt mbeɛd mi yemmut wemdakel-is, s wakka ikemmel abrid i yenjer Umerri deg umenuɣ ɣef timmunent d tlelli n tmurt.

Iwadaren Ɛli irewel-d si larmi n Fransa deg aggur n Meɣres aseggas n 1944. Akken yesla s Umerri, d umennuɣ-ines, yekcem di terbaɛt-is, yuɣal syin akin d afus ayeffus n Ḥmed Umerri: d lyuṭna-ines wis-sin. Akken kan yemmuten Umerri d Ḥaǧ Ɛli, yuɣal Iwadaren d aqerru ɣef Terbaɛt, syin akin tarbaɛt-a tekcem di Tuddsa Tuffirt: O.S. n ukabar n wagdud azzayri (PPA), kemmlen akken-nni, i wazal n 4 iseggasen, amennuɣ i yebda Umerri. Deg useggas n 1950, ass mi s tfaq Fransa i l’O.S. tsekfel-d imvberen yellan ɣef uqerru-yis, ttwaṭfen kra si terbaɛt n Iwadaren ma d wiyaḍ nɣanten.

Ata-n wacu yura weɣmis n Le Figaro ɣef tedyant agi yakan: « Mbeɛd mi ttnadin ɣef wergaz-agi, d umennuɣ yekkren, tlata n imenfan icudden ɣer ukabar n PPA, ttwaṭfen deg idurar n Leqayel. Yiwen ṭfent, sin nniḍen rrundan-d.» Iwadaren yettwaṭṭef ula d netta ɣer lḥebs aseggas-nni. Iɛedda di creɛ tlata (3) tikkal, uqbel ad-as-ḥkmen s lmut ass n 06 di Meɣres 1952.:

« D wagi i d abrid wis 8 ara iɛeddi deg wexxam n creɛ n Tizi Wezzu. Ḥekmen-as i Iwadaren, imenfi-agi n tmurt n Leqbayel, s lmurt. Llan ḥekmen-as yakan tlata yiberdan s ukerfi n yal ass. » I yura weɣmis Le Figaro.

Setta waguren mbeɛd, ass n 23 di Tuber 1952, ksen-as aqerru s lfinga di lḥebs n Tizi Wezzu, yuɣlen ass-a d axxam n yedles n temdint-agi. Aɣmis La Dépêche Quotidienne n wass n 24 di Tuber 1952 yura-d ula d netta di tewerqett-is tamezwarut: « Imenfi Iwadaren id-iɣeḍlen lxuf ɣef tmurt n Leqbayel gezmen-as aqerru iḍelli di Tizi-Wezzu. »

Akka ihi, i teḍra d Ḥmed Umerri d yemdukal-is. Fkan-d ayen umi zemren. Fkan tiyita i Fransa, almi seɣlin lǧehd-is di temnaḍt n Leqbayel. Ismawen-nsen qqimen deg umezruy, imi d nutni id-iheggan ussu i tegrawla n 1954, i deg yeddukkel wegdud s lekmal-is i wakken ad-yessufeɣ arumi. Ass-a nenna-awen-d amezruy i ilaqen ad yuttwaru deg yidlisen n umezruy, ad yettwasɣer deg iɣerbazen n tmurt. Deg useggas n 1983, amazray Tahar Useddiq yura adlis ɣef ugrawliw-agi umi iga azwel: Ḥmed Umerri (i d-yeffɣen Tizrigin Laphomic) i waken ad yeqqim yisem-is, yiwen ur t-itettu. Ass-a, ismawen n Umerri d yemdukal-is, ttazzalen ɣef yilsawen, qqimen deg isefra id-iḥekkun ayen xedmen. Ar ass-a n wussan, tilawin cennunt ɣef Ḥmed Umerri, sefrant ɣef ṣṣifa-s, ɣef nnif, tirrugza d tissas yella d ayla-s, ssefrant daɣen ɣef tmettant-is, ɣef wamek yettwaɣder di laman almi yuɣal d amedya i wid ixedɛen tagella d lmelḥ. Ula d ifennanen akk d imedyazen yettwasnen di tmurt n Leqbayel, bḥal: Ait Mangellat, Maɛtub, Mezdad Aɛmer, Nurdin Cennud, Jura, tarbaɛt tagrawla, tarbaɛt afus, …d wiyaḍ nniḍen deg aṭṭas yid-sen, cnan, ssefran, fella-s, nnan: d azamul n tegrawla, d azamul n tlelli u d amedya ɣef laman, ɣef tdukli yettwaxedɛen, akken yenna umedyaz deg wawal-is: « ziɣ kulci d awal, iḥbiben tikwal tettun azal n tdukli ». Ma medden zgan smektayen-d amek yemmut Umerri, nekni nesmenyaf ass-a ad nesmekti amek i yedder: d ilelli.

Kra n isefra :

1-Llah Llah Umerri

Ula d isem-ik d imserri

At-aya Ḥmed Umerri

At-a yekka-d Tizi-Wezzu

Abernus-is n leḥrir

I waḍu la t-yetthuzzu

Ad-tḥeznemt a tulawin

Yemmut ɣef uḍebsi n seksu

At-aya Ḥmed Umerri

At-a yekka-d Timizar

Abernus-is n leḥir

Iruc- it-id s leɛṭer

Ad-tḥeznemt a tulawin

Yusa-d ṭbib ad t-iẓer

……………………….

2-Keččini a Ḥmed Umerri

Ay izem id trebba tɣurfett

Tɣaḍ-iyi tmekḥelt-is

Truḥ tbeddel tayett

It-ixedɛen d iḥbiben-is

Mačči d tabenâemmett

………………………..

3-Lkar n At Umeqran

Xemsa uxemsin d aterras

Iḥbes-itt Ḥmed Umerri

Iḥseb-iten-id am tullas

Ad tḥeznemt a sut Wasif

Lexbar yewwed-d tarwa-s

………………………………

4- Tekkes taluft i yeɛdawen

Tusa-d ɣer igellilen

Ḥmed Umerri iten-iḥemlen

Nɣant wid yusmen

Issefraḥ igujilen

Isrus-d ungifen

S kra n win ixuṣṣen

Syes lerbaḥ ɛummen

Iḍum laẓ deg yexxamen

Yettawi-d ula d akraren

Iɣder-it win yumen

Ɣer tbaqit is-d-ihegga lekfen

Ait Menguellet (Tasfift asefru, 1986)

Ula d win t-inɣan

Ur yebni fell-as

Yenɣa-t s laman

Tegrad lmeɛna-s

Aqbayli ad iban

Ad t-ineɣ uqbayli

Ḥmed Umerri

Iɣab am yetri

………………….

Tagrawla (Tasfift Faḍma n Sumer, 1984) :

D argaz afeḥli

D idammen inifi

Lbaṭel ur t-iqbil ara

Yekker-d di teẓgi

Anwa wagi?

D Umerri.

Yekker-d d ilemẓi

Yeḥder i lbatel

Yexdem urumi

Di Ldzayer

Yeggul ur yekni

Mačči d awezɣi

Aɛdaw agi ad yepwaɣḍel

Yekker-d d ilemẓi

Yeḥder i lbaṭel

Yexdem urumi

Di leqbayel Yeggul ur yekni

Mačči d awezɣi

Aɛdaw agi ad yepwaɣḍel

Yextar amadaɣ

Yepas-d yepnaɣ

Wala ad yanez i ddel

………………………

Aɛmer Mezdad ( Amud n isefra :Tafunast Igujilen, Imedyazen, 1991, p.12.) :

Akken kan yebda tikli

Aṭṭas ip-yeddan fell-as

Semman-as medden imenfi

Nepa d tirrugza i d ayla-s

Ma d win illan d aneṣli

I Ḥmed isbur talaba-s

Anwa-t Ḥmed Umerri

Ma wer s-yezmir urumi?

…………………………

Matub Lwennas (Tasfift Tissirt n Ndama, 1987):

……………………..

Ur d-ǧǧin yimezwura

Ayen ara d-nebder nekkni

Argaz lqedd n truka

Yella deg wawal d Umerri

S lkuraǧ d tirrugza

I ittḥarab Arumi

Asmi yenfeḍ ɣef lǧefna

Ssebba-s d Aqbayli

Asmi yeɣli ɣef lǧefna

Ssebba-s d Aqbayli.

…………………….