Ass-a nerza-d s aẓekka-inek a kamal i wakken ad d-nemmekti,i wakken ad ak-d-nini: ayen i γef teγliḍ d wayen akk γef i tennuγeḍ, tarwa n tmurt taqbaylit ad t-terfed, ad t-tessemγer, ad t-tessiweḍ γer igenni.
"Ass n 2 deg waggur n wunbir 1982 – Ass n 2 deg waggur n wunbir 2013, 31 iseggasen aya segmi i k-nγan ifassen n icenga, icenga n teqbaylit, n tugdut, d icenga n tudert sumata.
Seg wass-n γer wass-a, aṭas i yeḍṛan, aṭas imeṭṭawen, aṭas n leḥzen, aṭas igujilen, imi ayen γef i nettnaγ, ayen γef nettwet, d wayen γef i nettwargam, d win yettebɛaden fell-aneγ, acku abrid i d-newwi d win i-nγil ad aγ-yesdukkel d wiyaḍ, maca nutni ttwalin-aγ s tmuγli-nniḍen, d iɛdawen n tmurt i aγ-ssawalen, armi newweḍ deg asseggas n 2001, tarwa-nneγ, yenγa-tt rṣșas n udabu-nni yefkan afus di lmut-ik.
Deg imir i d-ldint wallen,nwala wiyaḍ ttrun γef ayen yeḍṛan di tmurt n Falisṭin ,am wakken nekkni d icenga n Lezzayer. D tagi i d tamsalt-nneγ, rẓaget, qerriḥet, zeddiget, γef aya i d-kkren yergazen akked tulawin, ssakden s amezruy n umennuγ-nneγ wallan d akken tifrat, di timanit kan ara d tili acku igduden ittuqadaren di ddunit merra d wid yakk ifernen abrid n tlelli, d wid ur neqbil ara ad ddren ddaw uḍar n wiyaḍ.
Ass-a nerza-d s aẓekka-inek a kamal i wakken ad d-nemmekti,i wakken ad ak-d-nini: ayen i γef teγliḍ d wayen akk γef i tennuγeḍ, tarwa n tmurt taqbaylit ad t-terfed, ad t-tessemγer, ad t-tessiweḍ γer igenni.
Nusa-d daγen i wakken ad d-nini belli asirem d win iteddun yid-neγ ,imi ass-agi tamsalt taqbaylit tettwassen di ddunit merra, agdud aqbayli d win yesɛan leqder d tissas γer waṭas n yigduden. Ɣef waya ad d-nger tiγri i tikkelt-nniḍen, ad d-nessiwel i uγref aqbayli, ad yeddu deg webrid n cfawa : D lɛib fell-aγ ma nettu wid yemmuten i wakken nukkni ad nidir deg lḥerma. D lɛib fell-aγ daγen ma nebra i umennuγ di tizi yecban tagi. Ass-agi ilaq yal yiwen ad ixemmem gar-as d yiman-is, deg acu i d ten-nif yergazen d tlawin am wigi, ama d kamal,ama d wid-nniḍen, imi nutni fernen ad mmten γef tiktiwin-nsen, nekkni mazal neqbel tudert n ddel? Si tsusmi-nneγ sdat lbaṭṭel i tewweḍ tarwa-nneγ tessemenyaf ad tt-yečč lebḥeṛ wala ad tidir di tmurt imawlan yečča lḥif d llaẓ.
Nekkni nenna-d: ala! ala i ṭṭlam, ala i lmut, ala i ddel. Iswi- nneγ d win n yiseγ, d win n tugdut,d win n tudert d tlelli, ad nidir ddaw lebγi-s, neγ ad nemmet deg webrid-is. Ayagi, nezmer ad ak-neggal a Kamal, ilaq ad ak-negggal, akken tarwa n tmurt n yiqbayliyen d tin ara ikemmlen amennuγ, s tirrugza, s uzday n lqedd, akken ad d-nerr ayen illan d azref-nneγ."
Ad yidir uγref aqbayli di leqder d tlelli.
Tifrḍuḍ, ass 2 unbir 2013
