Akken kan teldi tiwwura-ines i tikkelt tamezwarut, aseggas-a, tasnawit tajdidt n Tiplakin i d-yezgan deg tγiwant n Wat Σisa Mimun deg tama n Wagennun tekcem deg wuguren : lexsas n ttawilat n uselmed, lqella n yiselmaden d yixeddamen-nniḍen ; meεna ayen i ten-iγelben akk d liḥala n lxuf i ttidiren yinelmaden n tesnawit-a, ama s daxel-is neγ deg berra-s. Σlaḥsab n wayen i aγ-d-nnan, aṭas n yiberraniyen i yeddewwiren dinna, ttawḍen tinelmadin n tesnawit-agi u ttaxlaqen yir tagnit ama daxel neγ berra n uγerbaz. ‘’Ilmẓeyen-a, keccmen, tteffγen akken i asen-yehwa mebla ma yeḥbes-iten yiwen’’. I aγ-d-yenna Mass Oukacha, yiwen gar yimawlan n yinelmaden. ‘’Taswiεt-a, tessaweḍ inelmaden armi ḥebsen s timmad nsen γef leqraya. Ulac iεessasen, inelmaden ttidiren s lxuf. Tasnawit-a, bezzaf teṭṭurfi γef yimekwan n tnezduγt.’’ Ikemmel yessḥassef urgaz-a. Tasnawit-a, qqaren deg-s yinelmaden n Tala Σetman, Tala Ililan, Aqawej akked Timizar Leγbar i yellan lemmden deg Tizi Uzzu neγ deg Jebla. Γef wanect-a, dγa, i d-tella yiwet n temlilit n yimawlan n yinelmaden akked yimḍebbren n tesnawit-a iwakken ad nadin γef tifrat. Sya ar din, aṭas n yimawlan i yendemmen imi qeblen rran-d arraw nsen γer umekkan-a.
