Ma nemmuqel amaḍal, ad naf dakken llant azal n 6000 n tutlayin, yal yiwen n wass tnegger yiwet gar-asent. Tutlayin-agi mačči d amdan i tent-id-yesnulfan. Qqaren-d zik yella yiwen n ugellid yebɣa ad yebnu yiwet n teɣremt iwumi qqaren « Babel » alamma tennul igenni, ad yesdakkel imdanen akk ɣur-s, ad ttmeslayen yiwet n tutlayt kan maca Rebbi ur t-yeǧǧi ara ad yaweḍ ɣer lebɣi-s ifraq imdanen-nni, wa ɣer ugmuḍ wa ɣer utaram. Syin i d-yebda umgarad n tutlayin d yilsawen. Tutlayt akken i d-yenna Ferdinand De Saussure : « d allal n taywalt, msefhamen yimdanen n yiwet n tmetti fell-as ; fkan-asen inumak i wawalen i seqdacen, ismawen i tɣawsiwin… »
Ulac tutlayt iseḥḥan neɣ tin iḍeεfen. Ma yella aɣref ur yefki ara azal i tutlayt-is, i tmusni, ḥseb-it yettidir ɣef rrif n umezruy, ur t-ixeddem ara, ad yeddu kan akken ddan waman, aman n wid yellan daxel n umezruy. Acuɣer tagnizit tufrar-d d nettat i d tutlayt tagraɣlant ? Tiririt tban am yiṭij, acku nutni d aɣref yefkan azal i tutlayt-nsen, rnan-as azal ameqqran i tmusni. Tamusni d lsas n yal tamurt. Akken i as-yenna Mass Mohamed Boudiaf aselway n Lezzayer aseggas n 1992 deg yinaw-ines aneggaru uqbel ad t-nɣen : « Timura-agi yettuqeddmen, s wacu i aɣ-ufent ? Ufent-aɣ s tmusni… »
Ma neddem-d tamaziɣt, yeddren d waṭas n tutlayin iǧehden am tlatinit, tagrigit taqburt… tigi tura mmutent, ggrant-d kan deg yidlisen, ur tent-yettmeslay yiwen xas akken sεant adabu, tira, tamusni. Tamaziɣt ur nesεi adabu, tira ( xas akken llant tfinaɣ maca ur urin ara yis-sent idlisen, ungalen…) mazal-itt ar tura tedder. Ma nuɣal s amezruy ad naf imaziɣen ur thennan ara ula d yiwet n tikkelt, sufeɣ kan yiwen ad yuɣal wayeḍ. Seg yefniqen εeddi-d ɣef waεraben alamma d irumyen ulac win i aɣ-izegglen. Uwten akk ad aɣ-sneggren, ur ssawḍen ara. Yerna yal yiwen dacu i d acewwiq i d-yuwi ; Aεraben nnan-as ad asen-awi ddin acku jehlen, Irumyen nnan-as ad asen-awi taɣerma acku d lewḥuc, am ticki nutni sivilizin.
Tura tuweḍ-d yiwet n teswaεεt tuεar, ili neɣ ur ttili ara (To be or not to be i as-yenna Shakespeare). Anda tagraɣlanit am tḥemmalt ma yella tufa-d iẓuran-ik uwten deg wakal ur ak-tettawi ara, ma tufak-id d affar ad teglu yis-k. Akken i as-yenna yiwen n umusnaw d Ahendi : « qebleɣ aḍu ad d-yekcem s axxam-iw, seg tewwurt, seg ṭṭaq, maca ad iyi-iqleε ur t-qebbleɣ ara ». Ihi yuwi-d fell-aneɣ nekkni s Yimaziɣen s umata, ladɣa Leqbayel ad nesseḥbiber ɣef tmeslayt-nneɣ, acku d nekkni kan i d imawlan-is ur yelli yiwen-nniḍen. Ad as-nerr azal i as-ilaqen, ad nerr azal ameqqran i tmusni, ad nissin tutlayin tiberraniyin, ad ilint d leslaḥ yis-sent ad nqabel ayen yellan.
