Degmi i ak-qqaren : “ddunit teddewwir, tettneqlab am teḥbult n uɣrum”. Waqil dɣa d tidet! Zik, win yekkren ɣer wayeḍ ad as-yini : “Welleh ma teswiḍ tibselt”. Deg ssuq ass-a, welleh ma tzemreḍ ad t-twaliḍ neɣ ad t-tqerrbeḍ. Yuɣal d Si lebsel! Ilaq ad tiliḍ d Si Flan iwakken ad d-tegluḍ yes-s s axxam. Ɛecralaf i lkilu! D lewhayem! Mačči d lebsel i aɣ-d-yecqan da. D ssebba kan i as-d-nufa iwakken ad yili wayen iɣef ara d-nemmeslay. Taggara-ya, ɣlayet lxeḍra, ɣlayet lfakya. Yeɛni tecɛel tmes deg sselɛa akk, yenza wulac. Ulac akk ayen i irexsen. Ayen tennuleḍ, ad k-id-yennal. Ah! Surfem-iyi, ttuɣ : anagar irgazen i irexsen. Mazal kan cwiṭ, ad teslem ula d nutni ttnuzun deg leswaq. A wi yeẓran anisa i aɣ-d-tekka teɣrit? A wi yeẓran s anda i tleḥḥu?
Iban d nekni. Tekka-d seg-neɣ. Nettwet s yifassen-nneɣ. Yernu mazal nendel allen-nneɣ, nɛemmed i wayen i la iḍerrun yid-neɣ. Amek?!
Tamezwarut n tmezwura, amur amaqqran deg yilemẓiyen-nneɣ xeddmen akk, ɣer Mesyu ‘‘QQIM’’. Ttwaxlasen akken yeqwem : s tɣimit, s wulac, iban lḥal! Tanekra seg yiḍes ɣef ttnasfa n wass, tuɣal normale. Deg leqhawi, ur tettafeḍ ara amkan. D imazzagen (spécialistes) akk n ddiminu akked lkarṭa. Ṭṭlam yeɣli-d ɣef wallen, tamart, acebbub, iberdan qeflen, tiwwura sekrent, idrimen ulac, ... Awer ẓren s anda tleḥḥu. Ufan-as abrid i usmiddeɛ : ulac lxedma. Tenger ddunit. Ma d tiferkiwin n ddin n baba-tsen qqiment akken d lbur. Tuɣal-asen tfellaḥt d lɛib. Ala! Ma ulac ad amsen yifassen-nsen, dderya n Sasa. Dɣa iruḥ-asen kullec. Teḍra-yasen am wid akken ur neṭṭif deg Rebbi, ur nferreǧ iḍebbalen, neɣ am win akken ur neṭṭiḍ bubbu, ur neṭṭir deg Uqbu. Lemliḥ deg-sen, d win ara ixedmen ayyur ad yeqqim rebɛa neɣ xemsa. Deg lweqt-a, akken ad tuɣaleḍ d argaz, ad tizmireḍ i yiman-ik, laqen-k ma ulac 35 ar 40 n yiseggasen. Cwi kan llan yimawlan. Maca ḥeslen deg wayen i d-urwen. Meɛna ahat bezzaf llum fell-asen. I nutni bɣan-tt akken zeɛma? Teffeɣ fell-asen? D tamɛict n waydi. Wissen!
Tis snat, d nekni i as-iɛemmden armi truḥ ifer taberruyt. Acuɣer? Yenna Lewnis deg wawal-is : “win yebɣan ad tseggem, iseggem iman-is!”. D tidet!. Ammer nabɣa ad tbeddel fell-aneɣ, tili nbeddel-itt. Ar zemreɣ ad awen-ggalleɣ — ɣas ur yi-ttamnet ara, d akellex — ar tesɛin ɣef mya deg-neɣ, d wid i ixeddmen anagar lefsad deg tmurt-a. Yuɣal wayen yelhan ibeddel ssifa. Yecbeḥ, bnin mi yuɣal d ayen n dir. Takerḍa, ddɣel, tismin tisemmamin, ... Ayen akk ur nelhi, nneɣ. Nessibnin tudert yes-s. Neqqar d adabu-nneɣ ay diri! D nekni ay d adabu. Yal yiwen deg-neɣ yettḍebbir, walukan ɣef yiman-is. Ihi, ur ilaq ara ad nekkat aɣyul ad neddaray tabarda. Tidet kan, win yewten iman-is s ufus-is, fiḥel ad yezwir ɣer yimeṭṭi.
Taneggarut, yernu d tin s i d-nufrar : d tidderɣelt. Γas akken ulac tin n dir i aɣ-izeglen, neqqar kan : “kullec igerrez”. Rray d ayla-nneɣ. Abrid ideg nleḥḥu, yessufuɣ, ɣas ɣer yiɣẓer. Ur nqebbel win ara aɣ-ineqden. Win iweɛɛan i gma-s, yessenger-it. Leɛyub n medden akk nwala-ten, anagar wid-nneɣ. Akka! D nekni ay d nekni. Yefka-yaɣ Rebbi iles d aɣzzfan, nerra-tt anagar i tmeslayt. Nhedder kan nrennu, armi aɣ-teɛreq ula d tutlayt-nneɣ. Nerra-tt imir-nni i usbernunnez s tid n medden. Leqraya, zeɛma neɣra! Surfem-iyi : ‘‘Nexxx...ra’’!!!!!. “Ulac deg-neɣ”, yenna Muḥya.
Tura, ad ilin deg-wen wid ara as-yinin : yehwa-yas kan. Lebsel yuɣal d asentel i tira. Nekk, ad asen-iniɣ : ur yi-d-yecqi lebsel, ur yi-tewqiɛ deg yilemẓiyen, texlu neɣ teɛmer. Aɣbel-iw, d tira. I yi-d-yecqan, d tira n tutlayt-nneɣ. Izen ay bɣiɣ ad awen-n-siwḍeɣ da, d tazmert i tla teqbaylit akken ad d-tini akk ayen ttidiren wid i tt-yettmeslayen. Meḥsub ayen nettidir, nettxemmim, nezmer ad t-id-naru, yernu s tutlayt-nneɣ. Nekk, uriɣ-d ɣef lebsel. Kunwi tzemrem ad d-tarum ɣef wayen i awen-yehwan. Tzemrem!. Bɣum kan!.
Ad teččem lebsel a Librobro
