TUSNAKT S WURAR
Sγur H.SADI
Anwa i d H.Sadi, ameskar n "TUSNAKT S WURAR" i d-suffγent Tezrigin ASALU deg 1990 ?
Tura ma ur cciḍeγ ara ahat nnig 40 iseggasen fell-as, maca ur as-ten-tettakeḍ ara ! Docteur deg Tusnakt, d aselmad deg tesdawit n Tizi-Wezzu send ad yunag γer Fransa deg-useggas 1982 (?) Tura atan aḍar dihin aḍar da, "am-wefrux ifirelles", akken i t-id-yeğğa win. Hend di tsuta-ines, seg-imezwura deg-imeγnasen n temsalt n Tmaziγt:ur εad zemmen fell-as 16 ( isegg°asen 66 d asawen) "asmi yebda tikli", imir-en d anelmad di lycée Aεmiruc.
Aterras-a ihi si zik d bab n tmussni. Nezmer ad d-nini kra n wacu i d-yeffγen deg-yidles-nneγ, Hend yetekki deg-s ama d tira, ama d la recherche, ama d l'action politique. Kra n wid i t-yessnen d inigan, zermreγ ad d-iniγ, Hend werğin yegga allaγ-is ad iseddeḍ! Ma d ass-a ata yella wayen yugaren aya.
Imeγriyen-nneγ ssnen d acu i d azru n rrxam. S Tmaceγ, qqaren-as timecci (+[C ). Llan wid i t-ireqqmen suffuγen-ed tisreγtiwin n rrxam, wi qqaren-asen isreqqaten. Hend d yiwen deg-sen, d acu kan netta macci d azru n rrxam id tafellaht-is: tafellaht-is d tusnakt. D nettat i wumi yeswakker. Yesraqet tusnakt, yernu s tmaziγt, yernu s wurar!
Yekkat armi i t-id-yewwi seg Teglest armi d ussan-a i γ-ibubben, ilul-ed wedlis deg-s 107 n yegna. Yal agnu, d tamsirt n tusnakt n tidett, maca daγen deg-s alaγmu n tmezzla . Yal asebtar d alaγmu n tmeslayt daγen.
Adlis-a yelha i win yettnadin tusnakt, i win yettnadin tamezzla, i win yettnadin tameslayt-nneγ ama yeqqar-itt, ama yesγar-itt.
Ad tafem deg-s MQIDEC, U-XELDUN, GEHHA, DOPPLER, GAUSS atg...la ttemεabbaren. Yal wa deg-sen yewwi-d amur-is di tmussni, di tmezzla.
Adlis-a daγen d tamsirt n umezruy. La γ-ed yeqqar Hend, Leonardo de PISA (FIBONACCI) yusa-d γer Bgayet, iqeggel
aṭas di tmurt-nneγ, macci i wakken ad iẓur GURAYA: yusa-d γer Bgayet i wakken ad yelmed tusnakt, yernu netta macci s wurar, aya di lqern XII. Di lawan-nni, Bgayet d tamdint n tmussni, d tmadint n tiεubbja, d lemqam n tusnakt. Macci am ass-a asurif γer zdat, sin γer deffir. Tamurt-nneγ meskint, teḍra yid-neγ am tuγ-amlal timendeffirt i nteddu !
Igna yellan deg wedlis, Hend SADI yebḍa-ten γef 6 yixfawen: Taneẓẓult, imdanen, tigda, tijelbiwin, taneggizt, iwarziwen, tiseqqar Ama deg tmesdlayt, ama deg tifratin.
Ih, amek ihi, awalen-a yak macci d tanglizit ! D awalen n tmselayt-nneγ deg tusnakt ! Anamek-nnsen ad t-tafem di taggara n wedlis, bab-is isedda-d amawal n tusnakt sin-meslay: Tamaziγt-Tafransist, Tafransist-Tamaziγt. Attan Tefransist-a , ar-iḍ-a tezga deg-ijuffar-nneγ, d acu kan d nekkni i t-yeḥ̣wağen, aql-aγ la nesseqdac deg-s, s taḍsa neγ s tmara.
Γas i-lmend n umawal-a i iman-is, adlis yuklal azal-is. Γiwlet a-t-id- tessisem ma ur ifukk ara.
Idlisen tura lan wid i ten-id yesuffuγen, ilaq daγen wid ar-a ten-yettaγen, ma ulac ur d-teffγen ara !
sγur Amar MEZDAD
Tukkist :
ḥuḥu d ḥriris
ḥuḥu d ḥriris d atmaten, ssawalen anagar tideât. Maca, tella yiwet n tsurift d tamectuḥt, yella yiwen wass i-deg ur ssawalen ara tideât : d ass n umulli-nnsen. Ass-nni, yal yiwen deg-sen yesxerwiḍ akken i s-yehwa. Ihi ass aneggaru n tefsut, aciban yesteqsa-ten.
Yenna-yasen :
- A tarwa, melmi akken i d ass umulli-nnwen ?
ḥuḥu yenna-yas :
- Nek, ass umulli-inu, d iḍelli.
Ma d ḥriris, yenna-yas :
- Ass umulli-inu d azekka.
Armi d azekka-nni tamγart n uciban tuγal γer warrac-nni, testeqsa-ten :
- A tarwa, melmi akken i d ass umulli-nnwen?
ḥuḥu yenna-yas diγen :
- Nek, ass umulli-inu, d iḍelli.
Ma d ḥriris yenna-yas diγen :
- Ass umulli-inu d azekka."
Afet-ed melmi lulen ḥ̣uḥ̣u d ḥ̣riris.
ḥend SADI
Tusnakt s wurar
ASALU 1991
yettwaks-ed seg wesmel:
[ندعوك للتسجيل في المنتدى أو التعريف بنفسك لمعاينة هذا الرابط]iεebba-t-id ar wesmel: Amnay
