Asmekti wis-tmenṭac n tmenɣiwt n tmeɣnast n izerfan n tmeṭṭut Nabila Ǧaḥnin, yettwanɣan s ufus n irebraben inselmen ass n 15 di Furar aseggas n 1995 di temdint n Tizi-Wezzu. Nabila Ǧaḥnin tella d taselwayt n tidukla "Tiɣri n Tmeṭṭut" yekkaten ɣef izerfan n tmeṭṭut u yettnaɣen mgal "Angal n Twacult"d-islal udabu deg 1984, yurzen tilelli n tmeṭṭut, yeččan izerfan-ines almi tuɣal ddaw uḍar n wergaz di tmetti ar ass-a.
Zriɣ ttwanɣeɣ... ẓriɣ ttwaɣedreɣ...ger wallen srafgeɣ
Maɛna ur mmuteɣ, ur ttmettateɣ...ger-awen zedɣeɣ
Nadit fell-i deg iberdan n temdinin, anza-w mazal-it anida akken xnunseɣ
Nadit fell-i...deg izenqan...di tudrin, ɣef tɣaltin am yiṭij feǧǧeɣ
Nadit fell-i...ɣef twenziwin n teḥdayin d tlawin...tid-nni iɣef nnuɣeɣ
Nadit fell-i...deg wallen n imeɣban...ɣef wudmawen n igellilen... dinna izedɣeɣ,
Din ad iyi-tafem...deg-sen i neṭleɣ, am tafat uɣeɣ,
Ma tnudam fell-i, ad teḥṣum ur mmuteɣ, ur ttmettateɣ...nek si ccetla wer nettmettat
D Tiɣri n tmeṭṭut, tin yuɣen am tafat
Wigi d idammen-iw yenneɣlen ɣef wezref, ɣef weɣref...umi nɣan imal, umi
ksen azal...akken ad s-t-id-rreɣ
Wigi d idammen-iw di tegnitt treqriqen,
D timiqwa, am twiztin ceɛlen, d tala ur nettɣar
Am wasif n wurfan ara d-nneflen, ara d-yenneɣlen, ad awen-yeddem iziɣer,
ad yeglu yis-wen ay imesḥafen,
A wid iṇeqqen tifekwin, teǧǧam tiktiwin,
Uɣent d tiftilin deg wallaɣen n wid iɣ-iḥemmlen
Nek si tadla n wid yellullin, n wid ibedden ur ɣellin
Tara-inu tefti, tefsa am jeǧǧig, mazal ad temɣi,
D imɣi mellulen, seg wid-nni ẓiden ara d-ilalen, ara ken-iqelɛen seg iẓuran-
nwen ay igujilen n wallaɣ, ay iderɣalen, ay ixnanasen, a widen yumsen, a wid
yemmuten ur ttunebdaren...
Tenɣam TAMEṬṬUT
Tlul d TILELLI
Tenɣam Tafekka
Tlul-d TIKTI, tuɣal d TIƔRI......tin ur nxessi
Mačči kan d itri d agur n tziri ...iḍ yal mi ara d-yeɣli ad d-teflali....ɣr-s i nettwali.
